انا مراتي شغالة مدرسة

واحد بيقول
انا مراتي شغالة مدرسة بتروح المدرسة الساعة 9 الصبح تخلص 4 توصل البيت على 5 أول ما تدخل البيت على طول تروح تنام
أنا كمان بشتغل بس بما إني شغلي قريب من البيت فبساعد في شغل البيت بس البيت بقى فظع المطبخ متوسخ مافيش حد بيغسل مفيش حد بينضف مفيش حد بيطبخ أكل كويس
أول ما ترجع من الشغل تروح تنام ولما أقولها إني زهقت من البانيه اعملي محشي او حاجه كويسه تتاكل تقوللى مش هاقدر أشتغل برا وكمان أشتغل في البيت قلتلها سيبي الشغل رفضت وقالتلي شغلي ده حياتي ومش هسيبه
قالتلي هات شغالة تطبخ وتغسل وندفعلها سوا
حتى موضوع العيال مش عايزة تخلف بتقولي لسه بدري مع إننا لينا سنتين متجوزين
أنا اضطريت أجيب شغالة وكنت بدور على حد ثقة واحدة ست كبيرة قالتلي عندي بنتي شاطره جدا لو تحب ابعتهالك قلتلها ماشي بعتتها فعلا واتفقنا على كل حاجة وبدأت تشتغل عندي في البيت
والله يا جماعة مش عارف أقولكم إيه
نضافة ذوق طبخ يجىنن البيت منور بيها الهدوم مغسولة ومكوية حتى مراتي عجبها شغلها
اشتغلت معايا حوالي 5 شهور وبصراحة عجبتني وحبيتها ودلوقتي بفكر أطلق مراتي وأتجوز الشغالة
أنا شغلي كويس ومكفيني إني أعيشها كويس وأنا محتاج ست تهتم بيا تجيبلي عيال وتهتم بالبيت تنصحوني بإيه رأيكم يهمني جدا.