عزمت امبارح صاحبتي وجوزها

امبارح عزمت صاحبتي وجوزها اللي لسه متجوزين وجوزها شغال مع جوزي. أول ما دخل البيت لقيته داخل بالشوز فقلتله يقلعه بره رد بكل ثقة دانا مراتي متقدرش تقولي كده! وبعدها قلعه وخلاص. قعدنا فبدأ التعليقات العجيبة
إيه لون الحيطة ده مش حلو! مع إني لسه داهنة لون جديد اسمه بريز كمبيوتر.
إيه النجف ده ويكلم جوزي انتو هتسيبوا النجفة دي كده
دخل أوضة الأطفال يصلي والأوضة مرتبة ونظيفة وبعد ما خلص يقول لجوزي إيه ده مكركبين الأوضة كده ليه على كام لعبة أطفال متحطين جنب الحيطة!
عدى الموقف وحطيت الأكل بشاميل فراخ مشوية رز بسمتي كفتة سلطات جلاش وسمبوسك. أول ما حطيتله ورك فراخ مشوي قاللي شيليه من قدامي أنا بقرف من الوراك! وبعدها هو حد يعمل رز جنب المكرونة مع إنه واضح إني عاملة تنوع عشان اللي ميحبش حاجة ياكل التانية. حاطه رول مشمع على السفرة عشان الأكل ما يبهدلش الدنيا قام يقول ما تكبري الرول شوية حتى اللفة منه رخيصة!

صاحبتي وهي بتاكل سابت حتة من الفراخ فقولتلها تكملها راح يقولها كمليها أهو أكلة واتحسبت عليكي! كأني عازماهم على فول ولا عدس! بعدين يقول اللحمة المفرومة طعمها مش قد كده مع إن أكلي بشهادة الكل جميل وجوزي رد عليه وقاله ده أحسن حاجة فيها أكلها!
بعد الأكل قدمت مانجة شرب منها بقين وحط الكوباية على الترابيزة وقال إيه ده طعمها وحش أوي! مع إنها كانت حلوة جدا! وبعد ما شلت السفرة لقيته قاعد على الركنة رافع رجله على الترابيزة وممدد بطريقة عمري ما شفتها في بيتي وبعدها يقولي لجوزي الشاشة دي وحشة وبطيئة شاشتي أحلى منها! مع إنها شاشة سامسونج سمارت 50 بوصة!

فضلوا لحد الساعة 1 بالليل ف جوزي قاله اقعد اتسحر معانا رد بكل بجاحة يعني هي مراتك كانت عزمت علينا
بجد حسيت إن حد سكب علي جردل مية ساقعة! وصاحبتي طول القعدة ساكتة لا بتاخده على جنب ولا بتقوله عيب ولا حتى كلمتني بعدها تعتذر عن أسلوبه! واضح إنها متعودة على قلة الذوق.
دلوقتي أنا مش ناوية أكلمها تاني ولا أزورها ولا أدخلها بيتي ولا أكمل الصحوبية دي! قرار صح ولا أنا غلطانة