ازي حامل لينا مدينا أصغر أم في العالم

ازي حامل وهي 5 سنوات !!! لينا مدينا أصغر أم في العالم.
في سنة 1939 راجل من قرية صغيرة وسط جبال الأنديز نقل بنته لينا مدينا اللي كان عمرها وقتها خمس سنين لمستشفى في مدينة بيسكو في بيرو.
الراجل قال للأطباء إن المسئول الصحي في القرية المعروف هناك ب الشامان حاول يعالج الانتفاخ اللي بيكبر في بطنها لكن من غير فايدة.
الدكاترة فحصوا لينا وكانوا متخيلين إن ده ورم لكن بعد شوية فحوصات صدموا لما اكتشفوا إن الانتفاخ ده مش ورم خالص.
أبوها قال للدكتور جيراردو لوزادا إن بدأ ييجي للبنت وهي عندها 3 سنين لكنه اختفى من حوالي سبعة شهور ونص.
الدكتور بدأ يفحص بطنها بالسماعة وسمع صوت دقات قلب تاني جواها. عملوا أشعة سينية ولما شافوها مافيش حد فيهم كان مصدق... لينا مدينا اللي لسه طفلة كانت حامل في شهرها السابع.
اتنقلت على طول لمستشفى أكبر في ليما العاصمة وهناك أكد الأطباء المتخصصين إنها حامل فعلا.
بعد ما تأكدوا من الحمل الشكوك بدأت تحوم حوالين چريمة والشك الأول راح ناحيه أبوها. السلطات قبضت عليه فعلا لكنهم اضطروا يفرجوا عنه لعدم وجود أدلة كافية.
وفي عيد الأم سنة 1939 كانت لينا عندها تقريبا 5 سنين و شهور ولدت طفلها بعملية قيصرية.
الطفل كان بصحة كويسة و سموه جيراردو على اسم الدكتور جيراردو لوزادا اللي شخص حالتها أول مرة.
الدكتور إدمنودو إيسكوميل وكان وقتها من أبرز الأطباء الباحثين في بيرو قرر يدرس الحالة أكتر.
وأكد في تقاريره إن الطمث عند لينا كان بدأ وهي عندها 8 شهور بس! يعني قبل اللي قاله أبوها بكتير.
كمان أكد إن لينا كانت ناضجة تماما زي الستات الكبار وقال إن اللي حصل معاها كان بسبب خلل
في نمو الهرمونات اللي بتفرزها الغدة النخامية.
لكن بالرغم من كل التحقيقات عمرهم ما عرفوا مين الأب الحقيقي للطفل والموضوع فضل غامض.
جيراردو ابن لينا عاش فترة طويلة وهو فاكر إنها أخته مش أمه.
وبعد سنتين من ولادته جات متخصصة نفسية أطفال أمريكية اسمها بول كوساك واتكلمت مع لينا بتفصيل أكتر.
وقالت كوساك في تقريرها سنة 1941 ونشرته نيويورك تايمز إن لينا كانت ذكية أكتر من سنها وإن ابنها طبيعي جدا وبدنيا أحسن من المتوسط.
الغريب إن لينا وأسرتها كانوا شايفين الطفل على إنه أخوها مش ابنها وده كان بيخلي الوضع النفسي أعقد.
ناس كتير شككوا في القصة وقالوا إنها كڈبة أو إشاعة لكن الحقيقة إنها تأكدت كذا مرة من أطباء في بيرو وأمريكا واتوثقت بالتقارير الأشعة الصور والخزعات ومفيش شك كبير حوالين صحتها.
جيراردو كبر وهو مقتنع إن لينا أخته لحد ما بقى عنده 10 سنين وساعتها زملائه في المدرسة بدأوا يسخروا منه ووقتها عرف الحقيقة.
وفي سنة 1972 لما جيراردو كان عنده 33 سنة لينا خلفت طفل تاني بس المرة دي من جواز رسمي من راجل تاني. يعني فعليا جيراردو جاله أخ صغير وهو في التلاتينات!
للأسف جيراردو توفى سنة 1979 وهو عنده 40 سنة بسبب التهاب في نخاع العظم.
أما لينا فكانت عايشة وقتها في حي فقير اسمه شيكاغو الصغير في ليما مع جوزها وابنهم.
الدكتور خوسيه ساندوفال اللي كتب كتاب عن حالة لينا سنة 2002 قال إنها كانت طفلة طبيعية جدا وإنها كانت بتميل تلعب بلعب الأطفال أكتر من إنها تهتم بابنها.