مرات عمي

مرات عمي غلطت مع عمي وخلفوا ولد بعد أقل من ٦شهور من جوازهم ومن ساعتها أهلها مقاطعينها ومتبريين منها وقاعدة معانا في بيت العيلة وعمي مسافر بيشتغل برة، يوم ٢٨رمضان كانت عندنا بتحضر الفطار وحاطة ابنها على فوتيه قدام التليفزيون وأنا بشيله عشان أقعد مكانه اتزحلق من إيدي وقع عالأرض ڠصب عني والله بس اتهبد هبدة جامدة، خرجت جري من المطبخ على صوت الهبدة والصړيخ بتاعه وزعقتلي مش تخلي بالك؟ المهم كلمة مني على كلمة منها قلتلها دانتي واحدة شوارعية وجايباه من الحړام انتي ليكي عين أصلا تفتحي بقك؟ سكتت خالص ومردتش عليا وخدت الولد غسلتله وشه ورضعته وشالته على إيدها ودخلت تكمل شغلها في المطبخ ولما جه وقت الفطار قالت لجدتي أنا تعبانة من وقفة المطبخ هاخد نايبي أفطر فوق وأريح جسمي، استنيناها تنزل بعد الفطار زي كل يوم تكمل السهرة معانا مظهرتش قلنا يمكن نايمة وهتنزل بعد كام ساعة برده مظهرتش ولغاية السحور طلعت أنا وعمتي نشوف حكايتها إيه ونطمن وفتحنا بالمفتاح بتاع جدتي لا لقيناها هي ولا ابنها، لمت شوية من هدومها وهدومه وسابتنا بنفطر وخدت بعضها وفص ملح وداب، طبعا مراحتش لأهلها إللي مستحلفين أصلا يخلصوا عليها لو شافوها تاني والله أعلم يمكن تكون فعلا راحتلهم وقتلوها وناكرين وجوزها نزل امبارح على ملا وشه ومختفية هي والولد من ساعتها وتليفونها مقفول، أنا ممكن أكون السبب فاللي حصل ده لما عايرتها أنا عارفة، بس مش عارفة أعمل إيه أو ممكن يكون حصل لها إيه